NASKAH TEKS SESORAH
PANYARTA ADU WASIS SAKING MTs N MODEL BABAKAN
Assalamualaikum Wr Wb.
Dumatheng panjenenganipun Bapa/Ibu Juru Pambiji
Sesorah ingkang tansah kula hormati,
Dumatheng Bapa/Ibu Dwija Basa Jawi Pandamping Panyarta Adu Wasis Sesorah ingkang kula hormati,
Saha, dumatheng para Panyarta Adu Wasis Sesorah ingkang kula tresnani.
Dumatheng Bapa/Ibu Dwija Basa Jawi Pandamping Panyarta Adu Wasis Sesorah ingkang kula hormati,
Saha, dumatheng para Panyarta Adu Wasis Sesorah ingkang kula tresnani.
Saderengipun kula nyuwun agunging pangapunten
amargi kumowantun cumantaka matur ngadeg wonten ngarsa panjenengan sedaya
saperlu ngaturaken sesorah ingkang hanggadahi Irah-irahan “Marsudi
Unggah-Ungguh Basa Jawi Tumrap Kawula Mudha ing Jaman Modern”.
Salajengipun sumangga kula aturi sesarengan
ngunjukaken raos puji syukur dumatheng ngarsa dalem Allah SWT, ingkang sampun
paring kasarasan, karaharjan, sahengga wonten enjang punika kula lan
panjenengan taksih saged kempal manunggal hangrawuhi adicara adu wasis sesorah
basa Jawi.
Sholawat saha salam mugi tansah katetepaken
Allah SWT dumatheng junjungan kula lan panjenengan Nabi Agung Muhammad SAW, ingkang kita
ajeng-ajeng syafa’atipun benjang wonten yaumul qiyamah, allohuma amin!
Para rawuh kakung miwah putri ingkang kula
hormati,
Kula lan panjenengan sedaya angertos bilih
ing madyaning jaman modheren sapunika unggah-ungguh basa ndadosaken sandhungan
tumrap basa jawi. Maksudipun ing wekdal punika kathah tiyang ingkang nilar basa
jawi, amargi rumaos ribed anggenipun migunakaken basa krama, kuwatos yen klentu
utawi kuwalik. Cak-cakanipun unggah-ungguh basapunika dumunung wonten ing basa
ngoko lan krama. Nanging ingkang karaos tansah damel ribeding manah punika basa
krama. Langkung-langkung tumrap tetiyang ingkang ing pasrawungan
sadinten-dinten boten nate utawi awis-awis migunakaken. Ingkang asring
nuwuhaken manah prihatos, punika wonten sawatawis brayat mliginipun kawula mudha
ingkang langkung seneng ngulinakaken basa mawi basa Indonesia, kanthi alasan
langkung gampil, langkung praktis, lan boten badhe tuwuh klenta klentu kados
yen migunakaken basa Jawi ingkang mawi undha usuk lan unggah-ungguh. Langkung
prihatos malih menawi alasanipun bilih ngginakaken basa Indonesia katingal
langkung moncer lan langkung modheren tinimbang yen migunakaken basa jawi.
Pramila lajeng sami mlembar migunakaken basa Indonesia utawi basa manca.
Para Rawuh kakung miwah putri ingkang kula hormati,.
Menggah ing tata lair, marsudi unggah-ungguh
basapunika ateges nguri-nguri gesangipun basa Jawi, lumeberipun tumut
nyengkuyung adegipun budaya lan kagunan Jawi ingkang adiluhung. Nanging sejatosipun,
marsudi unggah-ungguh basa ugi ngemu suraos ingkang wigatos lan lebet, inggih punika
angudi subasita utawi tatakrama. Wondene wujudipun inggih punika watak andhap
asor, seneng ngaosi tiyang sanes kanthi lambaran lantip ing sasmita, tajem ing panggraita,
saha mawarni-warni bebuden luhur sarta watak ingkang utami. Malah saestunipun
bebuden luhur sartawatak ingkang utami mekaten punika sampun dados satunggaling
jatidhirinipun tiyang Jawi, sumrambahipun ugi dados salah satunggaling
kapribadenipun bangsa Indonesia.
Tiyang Jawi nengenaken sanget unggah-ungguh,
subasita utawi tatakrama, amargi nggadahi watak wantu andhap asor saha seneng
ngurmati ing ngasanes. Nanging mboten ateges tiyang Jawi punika lajeng tansah
rumaos dados tiyang ingkang asor lan remeh martabatipun. Sami kaliyan
bangsa-bangsa sanes, tiyang Jawi tetep tansah njagi ajining dhiri pribadhi.
Dene sarananipun inggih malah unggah-ungguh basapunika, awit tiyang ingkang
saged ngaosi ing ngasanes, temtu ugi dipunaosi martabatipun. Wonten Sesanti : “Ajining Dhiri Saka lathi”. Wonten ing
sesanti kasebat tembung lathi
mralambangaken pawicanten utawi wedaling basa. Kanthi mekaten, sesanti punika
ngemu suraos bilih tiyang ingkang basanipun sae, tansah migunakaken
unggah-ungguh basa, mesthi dipunaosi dening tiyang sanes. Kadosta Hadist
Riwayat Bukhori lan Muslim ingkang uninipun مَنْ كَانَ يُؤْمِنُ
بِاللهِ وَالْيَوْمِ الآخِرِ فَلْيَقُلْ خَيْراً أًوْ لِيَصْمُت
Ingkang nggadhahi werdi “Sinten mawon ingkang
nggadahi iman dumatheng Allah lan dinten kiamat kedahta wicanten ingkang sae
menawi mboten langkung sae mendhel.”
Pramila tumrap tiyang Jawi utawi sok sintena
ingkang purun marsudi unggah-ungguh basa kanthi tumemen, badhe ngundhuh woh
ingkang pangaos, mirunggan ing bab tumindak saha bebuden luhur. Mugiya Gusti
Allah tansah paring kekiyatan dumatheng kula lan panjenengan sedaya kangge tetep marsudi unggah-ungguh basa
jawi murih terus gesang lan ngrembaka. amin.!
Mekaten atur kula mbok bilih anggen kula
matur kathah klenta-klentunipun lan kirang subasita, kula nyadong sih agunging
samudra pangaksami. Matur nuwun awit kawigatosanipun.
Wassalamualaikum
Wr. Wb
Tidak ada komentar:
Posting Komentar